StoryEditor

Gospodar mi je reka: Ti si sin moj; ja san te danas porodi. Išći ol mene, i dat ću ti puke za bašćinstvo tvoje

Piše PSD.
31. prosinca 2019. - 11:30
maliisus

Lîbar ol sȁlām

Salam 1

1Blago ga se čejadinu ki ni uliza u viće ol farmasunih,
i ki ni na putu ol grišnikov bi sta,
i ki ni na katridu ol kuge bi se;
2vengo je u reguli ol Gospodara hotinje njegovo,
i obo reguli njegovon pensa obdan i obnoć.

3I on će bit kako cablo ča je usađeno uza vode
ča tečedu,
kô će dat fruta svojega u vrime svoje;
i lišće njegovo neće olpast;
i u sven čagod bude činit prošperirat će.

4Ne tako farmasunski, ne tako;
vengo kako prah ča ga rastrkaje vitar su face ol zemje.
5Zarad tega nećedu se jopeta ustat farmasuni na tribunalu,
ni grišnici na šeduti ol pošćenjačin,
6jerbo poznaje Gospodar progadur ol pošćenjačin;
i put ol farmasunih deštrigat će se.

Salam 2

1Zarad česa su se uzvitoperili narodi,
i puci su propensali gluparije?
2Digli su se kraji ol zemje,
i glavari skupili su se ko jedan
kontra Gospodaru i kontra krstu njegoven.
3Iskidajmo uzle njihove,
i zahitmo ća ol nas karag njihov.

4Ki pribiva na nebesiman podsmihivat će nin se,
i Gospodar će nin se podrugivat.
5Ondac će parlat njiman u jidu svojen
i u jidu svojen izneblušivat će jih.
6Ja sâm metnut san ol njega za kraja
nada Sijunon, šanton goron njegovon,
predikajuć befel njegov.

7Gospodar mi je reka: Ti si sin moj;
ja san te danas porodi.
8Išći ol mene, i dat ću ti puke za bašćinstvo tvoje,
i tebi u poces mejaše ol zemje.
9Guvernat ćeš nada njiman šupružinon gvozdenon,
i kako vrč lopižarev razbit ćeš jih.

10I sadar, kraji, kapijte;
adukajte se, ki arbitrajete zemju.
11Budte šervicij Gospodaru u prpi,
i fešteđajte ga su drćanjen.
12Ćapajte adukacijun, da se ne najidi
Gospodar,
i da poginete mimo puta pravega.
13Kal se usekund rasplandiža bis njegov,
blago ga se sviman ki se ufadu u nje.

Salam 3

1Salam ol Davida, kal je biža ća od obraza Ašalunovega, ol sina svojega.

2Gospodaru, ča su se uzmnožali ni ki me dišperadu?
veleti njih dižedu se kontra mene.
3Veleti njih govoridu animu mojen:
nima šalvanja njegovega u Bogu njegoven.

4Ti sâm Gospodaru, primitej moj jes,
glorija moja, i uzvisitej glave moje.
5Glason san svojin ki Gospodaru vapi;
i udovoji mi je sa šante gore svoje.

6Ja san spava, i naspava san se;
i usta san se, jerbo je Gospodar primi mene.
7Neću predat prid ijadan pukov ča bidu me zapasali.

Ustan se, Gospodaru; šalvanega učin mene, Bože moj.
8Jerbo, ti si zamlati sve ne ča me laskadu brez prosuđenja;
đente si ol grišnikov razbi.
9Ol Gospodara je šalvanje;
i nada pukon tvojin blagoslov tvoj.

Salam 4

1Na svrhu, u pisman. Salam ol Davida.

2Kal san zavapi, udovoji mi je Bog ol pošćenja mojega,
u dišperacijunu rasprosti si meni.
Pomiluj mene i udovoj moljenju mojemu.

3Sini čovičanski, doklen ćete bit tvrdega srca?
Zarad česa jubite praznoću i išćete floćanje?
4I jemajte na pameti kako je Gospodar mirakuložasto uzveliča nega šantega svojega;
Gospodar će mi udovojit kal buden vapijat ki njemu.

5Najidte se, ma nemojte sagrišit;
za no ča govorite u srciman vašiman, u kamaran vašiman pokajte se.
6Prikažte posvetilišće ol pošćenja, i ufajte se u Gospodara.

Veleti njih govori: Ko će nan prizentat ča dobrega?
7Sinjana je nada namin luminažitad obraza tvojega, Gospodaru.
dâ si alegriju u srcu mojemu.
8Ol fruta šenice, vina, i uja svojega, uzmnožani su.

9U pačifiku ten samen drimjat ću, i počinut ću;
10jerbo si ti, Gospodaru, apožito u ufanju ugradi mene.

Salam 5

1Na svrhu, za nu ka bašćinstvo slidi.
Salam ol Davida.

2Riči moje ušiman ćapaj, Gospodaru;
vapijanje moje kapij.
3Ošervaj se na glase ol moljenja mojega,
kraju moj i Bože moj.
4Jerbo ja tebe molin, Gospodaru:
udovojit ćeš rano glasu mojen.

5Stat ću rano kraj tebe i vidit ću
jerbo si ti Bog ki ne voli nepošćenje.
6Niti će u tebi stat kogod zal,
niti će pril jočiman tvojiman izdurat ni nepošćeni.
7Nenavidiš svih ča činidu nepošćenja;
ismrvit ćeš svih ča parlanjen floćajedu.
Čejade krvološno i himbeno ogadit će Gospodar.

8Ja ću sâm naprama velon samaritanšćini tvojon
ulist u kuću tvoju;
klanjat ću se u šanten tempalu tvojen
u prpi tvojon.
9Gospodaru, vod me u pošćenju tvojemu:
zarad dušmanih mojih uprav prid obrazon tvojin progadur moj.

10Jerbo, nima u justiman njihoviman prava;
srce je njihovo šupje.
11Greb otvoren grćan je njihov;
jaziciman svojiman inganajedu:
arbitraj jih, Bože.
Neka olpadu ol nadazdrivanjih svojih;
naprama velon pokvarenošćon njihovon izlaskaj jih,
jerbo su fotali tebe, Gospodaru.

12I neka se diletadu svi ča se ufadu u te;
zanavik ćedu se sulacat i stat ćeš u njiman.
I glorijat ćedu se u tebi svi ki jubidu ime tvoje,
13jerbo ti blagoslivjaš pošćenjačinu.
Gospodaru, okruni si nas ka šćiton ol dobre voje tvoje.

(Prijevod na čakavštinu bračkih Selaca: Siniša Vuković prema latinskoj Vulgati)

Izdvojeno

09. kolovoz 2020 16:56